29
Nehalennia zomer 2020 nr. 208
Songfestival
Oewel m'n van tevore wiste, dat t'r achter zö'n songfes
tival eêl wat meer steekt, dan alleênig ma 'n bitje liedjes
zienge deü leuke jonge ménsen, waère mien vraauwe in
ik d'r wi pontificaol vó gaè zitte. Net as bie 'n interlaand
voebalwedstrijd vroege m'n oöns eige aof, of't deze keer
noe eindelijk 's raèk zou weze mee 'n overwinning van
oónze eige vertegenwoordigers. Glaèsje wien d'r bie. 'n
Schaèle mee lékkere smikkeltjes. Wat oöns betreft kon 't
spektaokel beginne.
Ieder jaèr kriege m'n 't wi vö'eschutteld. Zö'n stik of vuufin-
twintig laanden die d'r nieuwste song komme presentere.
Op die oagenblikken bin ik nog stees dat éénvoudige
boerejongetje. Ik bin naèmelijk van meêning dat 'n lie-
derenfestijn gepaèrd gaèt mee liedjes. Mis, Van Zijp, zö'n
songfestival bestaèt vö 'n deêl uit gymnastische toeren van
vrimde ménsen, bezaoid mee draèkachtige figuren op d'r
lief. Ik zag d'r nog eên die 'n radslag maèkte op 't toneêl.
Dat durreve de meêste ménsen nog nie eêns op 't straand.
Vérder vele keren jasje an jasje uut. D'r was d'r nog eêne
bie, die in eên ruk tweê meisen tegelieke d'r jurk uut trok.
Songfestival, jao,jao.Op 't ènde van 't spektaokel won
toch die groep van wie 'k 't liedje nie oard ma alleênig
die acrobaotische toeren ezien as aofleiding van 't ge
brek an muzikaoliteit. In toch bliekt da ze oönder 't kroön-
kele, 't sprienge in ct schudde mit je gat, ok nog 'n liedje
ezongen
Kieke die stèmmers in aol die laanden daè noe nie dwas
deur eene? Neênt ménsen, die stèmmers geve d'r punten
zödaènig da ze zèllef op 'n plèkke
komme te staèn die garandeert da ze 't kommende jaèr wi
mee magge doe.
't Gaèt alleên om de commercie, begriep je wé?
Èllek jaèr zie m'n dat bepaèlde groepen van deêlnemers
mekaore de bal toespele. Oönze laanden in 't wésten per-
bere daèrentegen zo eerlijk of vriendelijk mogelijk te stè-
mme. Ma dat 'n prima groep as de Nederlanders mee nie
meer dan èllef punten naèr uus most, was toch nie eêmaè
eerlijk.
Noe is 't op zö'n festival nie aomaè kommer in kwèl. D'r
traède ok gewone ménsen op. Oönze eige inzending was
t'r 'n voorbeeld van. 'n Prachtig lied. Tweê éénvoudige
jonges mee 'n achtergroóndtrio, zoönder malle fratsen. Vö
mien, be'oarende bie de besten, ma die alleên as oönbe-
langrieke medediengers van dezen in gene 'n paèr puntjes
krege.
Ma 't is in 't bluuft 'n wedstrijd, niks meer of minder dan
aardloape. Ik 't a meer ezeit. Oöns leve bestaèt t'r uut om
oöns njee mekaore te mete Of't noe gaèt om klaoverjasse,
bingo of vérre-spie. Ma as je 't mien vraègt ao 'k liever de
meziek d'r buten elaète. Oe kunne ze 'n wedstrijd aauwe
van iets waèbie d'r zó vee verschillende smaèken bin. Oe
ka je countrymeziek vergelieke mee de schone blauwe Do-
nau? Oe kan 'n groep ménsen waèvan d'r 'n paèr over de
grond krupe onder 't uutstoate van vèrrekesgeluden zich
mete mee 'n meise van zestien jaèr, mee 'n beeldschoan
liedje?
In toch oart 't georganiseerd. Commercie ménsen in nie
aores. Tot mien schaande mö 'k je bekènne da 'k d'n eêlen
aèvend bin bluve kieke. Meer uut nieuwsgierig'eid. Zö van,
wat za d'r noe wi vö d'n dag komme? Ma dat de acrobao-
tengroep uut de Ukraine zou winne stieng a gauw vast. We
popelen van verlangen om oönze westerse zegeniengen
in producten in de vormaolige sofj etrepublieken te gaè
showen.
Intussen mèrrek ik da 'k op de politieke toer eraèkt bin in
daè deug ik eêmaè nie vö. Ik persoanlijk de beste erin-
neringen an de ménsen uut de Ukraine, 't Was in 'n tied da
m'n noadgedwongen verplicht waère om kènnis mee me
kaore te maèke. Van weerskaanten m'n perbeerd om d'r
't béste van te maèke. Ik magge luustere na zachte Russi
sche liedjes. Oönbegriepelijk vó mien Schouwse oaren, ma
de tedere woardjes gleeje d'r in as zoete koeke. De Russi
sche meisjes in jonges waère gekleêd in vurmeloaze jassen
in laèzen zoönder akken. Int begin ao m'n 't wat moeilijk
mee mekaore. Ma toe de doekjes in de jassen aof'eleit
waère, in de lange vlechten vó d'n dag kwaème, verbeterde
dat langzaèm an. En toe d'r eêne op 'n aauwe viool begon
te spele in wilder, saoie Nederlaanders verzichtig 'n rus
sisch meisje vroege vó 'n daansje was 't ies gauw gebroke.
't Was vö mien eên van de elderste lichtpunten in 'n doön-
kere tied.
Daèrom ao 'k d'r vrede mee, dat de groep uut de Ukraine
gewonnen ao. Omdat de groatvaoders in groatmoeders
van die kinders mien onvergetelijke tieden laète beleve.
Evenmin as ik, de toenmaèlige Nadja in Alexei kunne
vermoede dat d'r kleinkinders in 't Engels, misschien
zoönder te begriepen wa 't betekende, 't songfestival van
Europa zouwe winne. Ik zèllef ok nie kunne verstaè waè
't over gieng. 't Engels van die kinders was vö mien net zö
onverstaènbaar as 't Russisch in negentienvierenveertig.
Ma wie daè op lèt is 'n kniesoare.
Joop van Zijp, Joop van Zijp vertelt, deel 2
Dialect Westerschouwen.
Waar eens de koeien graasdenRoger Blaakman