m
56 rn
Aflevering 173 herfst 2011
Trekveugels
September bezurg me verschillende gedachten,
an 'k saovens op de trekveugels staon te wachten.
Nog a wa bekènden trekken dan 't land uut,
zó as de zwaluw, de koekoek, tortel èn kluut.
Oek 't visdiefje èn blauwborst trappen 't af,
net as de gele wielewaol, kwartel èn tjiftjaf.
Ik kan die liiste nog wè vee langer maoken,
mao dan goan 'k nóóit an 't ènde raoken.
Veugels die an ier bluven, gaon 'k nii anaolen,
wan dan goan 'k van 't onderwérp afdwaolen.
Ik bèn nii bliije om de veugels die vertrekken,
maor om de zwèrmen die ier binnentrekken.
De vriesganzen óór j' a van vérre ankommen.
Ze kommen uut 't noorden in dichte drommen.
Z'èn a vierduzend kilometer op den teller staon
èn open voo mèrte nii trug naor uus te goan.
Daor is nog een geluud wa 'k nii wil missen.
't Bèn smienten, je kun je'n eigen nii vergissen.
Mao de mééste veugels ouwen udder bek dicht.
Die zie je soms maor eventjes in 't maonlicht.
Een zêêaorend zie je maor een ienkele kêêr.
Maor oek bonte kraoien zie j' aost nie méér.
Outsnippen moe je noe nog nii verwachten.
Dao voo moe je nog tot november wachten.
Mee plezier zien 'k wee de zwaoenen zitten.
Soms kleine, maor oek van die gróöte witte,
't Is een plezier om deu de polders te dwaoelen
èn mee de kiiker de veugels korter bii t'aolen.
Beseffen dat die veugels a vee méér zaogen
dan jii mee je moter of je modèrne waogen.
Da ze nóóit een GPS of een kompas gaon aolen
èn toch zullen ze zelden of nóóit verdwaolen.
Dienk daor es over nao, over al die dingen,
misschien gao je dan een tóóntje laoger zingen.
Mao vergeet toch vooral nii om te genieten
van de trekveugels die udder land verlieten.
Evergem, winter 2008, Leen de Jonge
