Aflevering 173 herfst 2011
Ik höorende bie de paer die 't 'r niej ofspronge.
't Was de êêrste sportprestatie van m'n leven,
In voorlaopeg aok d'n lesten.
II.
Behalve volleybal, waere balsporten niks voor mien.
We krege op de HBS aok hockey, mar soms vloge deur 't hakken mit zöö'n
stick de stikken gors nog haoger dan 't balle'ie.
Op 'n kêêr krege m'n aok haogspriengene bie Flip, zoas wiele de
gymnastiekleraer noemende. Hie hao dichte niejt veel orde. Op 'n keer was
'n zelfs deur wat jonges in 't volleybalnette ewikkeld.
Deur m'n training bie de mééster vroeger, maekende ik de haogste sprong:
êên meter vuufinveerteg.
III.
Op de kweekschoole hè 'k m'n bevoegheid ehaeld om zelf gymnastiek
te magge gevene. Bevoegdheid j hiejtende dat, in as ie 't hao gaf 't 'n
voorsprong as ie solliciterende, 't Examen dëêrvoor hao nog veel voejten in
de aerde in duurende wel 'n hêêlen dag.
Twéé lessen mos ie geve in êên dêêrvan was 'n spel. Welk spel, dat
höörende je pas 's ochens. Voor mien was 't korfbal in 't wier knudde. De
kinders wiste de spelregels beter as ik in ik wier haest uut'ejouwd.
De theorie van 't vak heit m'n ered.
'n Moeileke vraeg over kastiebal, 'n soor honkbal, heit de deurslag egeeve.
De vraeg was zöö ingewikkeld, dat de gekommiteerden d'r zelfs 'n tekening
bie most maeke. De vraeg was: is d'n bal noe in of uut as 'n dêêr neerkomt?
Ikke mar knikke van ja, ja, mar de de man zei geprikkeld: "k Vraag het aan
jou, in of uit?" Ik snappende d'r niks van in gokkende vastberaeje: "In."
"Uitstekend", zei 'n.
Ik hae 't ehaeld.
IV.
Jaeren waere verbie'evloge.
De méésters, wéér 'k dêêrnet over hao, waere al lange mit pensioejn.
Die middeg hao "k in Stellendam op 't gors achter 't Haegse Huus kastiebal
egeve.
Dat was nog knap lienk, want de kinders moste goewd uutkieke of 't 'r
géén hongestrond tussen 't gors lei, azze van de êëne paele nae d'n aoren
rennende.
Diejn dag kwam ik op de fiets langs 't huus van mééster De Lêëuw in
inééns viel m'n aoge op iejtewat bekends: De haogspriengpaelen, de vèrve
d'r of ebladderd in de spiekerties roewsteg, mar noe as steun van de
tomateplanten.
Pau Heerschap, dialect Ouddorp
