m Daè komme de schutters
46 Aflevering 173 herfst 2011
J'n oed in je nikke
de boge gespanne
je kiekt langs je piele
Naë de top van de prange
Los en daè gaèt 'n
Een piele op jachtè
De schutter kom rechte
En het veugeltje lacht
Snie een moaie rechte tak uut een troenkbööm, doe an 't ènde een bitje glad
stevig touwtje, buug de tak en maèkt touwtje an 't aore ende vast. Dan ei j'
een booge. Een piele maèk je van riet mie een topje van vleerout, een din
latje of een takje kan ok. Wie ei dat as kind nie edae? In een ogenblik was je
as indiaan gewapend. Op zoek naè duven die a je noait kon raeke, mae een
blikke buzze op een paele was ok goed.
Is zö de schutterij ontstae of is van de schutterij het spel over'ebleve?
A me het over de schutterij in Zuud-Beveland, dan kan 't mae over eên
dienk gae: schiete mie piele en booge oftewel de wipschutterij. Deze, in
Nederland taemelijk zeldzeame, sport wor mie naeme beoefend in Zuud-
Beveland, in Zeêuws-Vlaanderen en in België.
Oewel a in deze sport ontwikkelingen ok nie stille stae, wordt 'r overwegend
nog mie de eenvoudige andbooge 'eschote. Het materiaal bie de schutterij
is beslist gin wilgetak mï, mae öögwaerdige kunststof die a de booge enorme
veerkracht geeft.
De durpen daè a vereênigen of sociëteiten bin van schutters een
schietweie, da 's het terrein waè a 'eschote wordt. Op de schietweie zie
je meestal van varre de stenge stae. Een stenge, zö'n 25 meter ööge, is de
mast waèrop de prange staèt. De prange is een soort vurke waè a ze de te
schieten doelen, de 'veugels', op vastmaeke.
Het schieten gebeurt van vlak onder de stenge naè boven toe. Schiete op
de staende wip eêt dat. De stenge, de mast, kan naè benee ehaele worre.
Vandaè de naem wip. Oe zou je anders de veugels d'r op motte kriege. De
'veugels' op de prange kenne verschillende waerden en zó kan d'r estreeë
worre om de meeste punten. Elke vereênige ken z'n koningen en keizers.
De wedstrijden op zowel de staende als de liggende wip gae in meerdere
ronden. Een streng reglement bepaelt oe a t'r 'eschote mö worre, an wat a
de booge mö voldoe, de waerde van de veugels enzovoort.
De liggende wip wor 's winters gebruukt. Dan wordt in een café of clublokaal
een baene 'emaèkt van een meter of zestiene en de prange kom horizontaal
te liggen op een stellage op een öögte van anderalve meter. De sfeer zowel
buten as binnen is ontspanne en d'r is ruum tied voe een praotje en een
goed glas bier of een andere vochtige lekkernij.
A je een schietweie passeert daè a een wedstrijd aan de gank is, mö je
zeker es even gae kieke. Entree wodr 'r nie evroge. Maèkt een praotje mie
eên van de schutters en a eêl gauw wor je in'ewijd in deze tak van sport.
Kiek uut voe vaollende pielen. De schutters löpe naè de stenge onder een
overkapping van gaais en pieleraepers, jongers die a de pielen opraepe,
draege een helm.
