Sjao, 'oe zunne me da noe 's in 't vat giete.
Ringrieën (vervolg)
Neê, ringrieën is nie mi de folklore van vroeger, toen a wat boeren en d'r
zeunen éên keer per jaer d'r eihen uutleefde op ulder eihen durp. Het
meedoen was vö velen belangrieker dan het winnen. Noe is het een sport
hore vö iedereen, joeng en wat ouwer, man of vrouwe. Wat kaatsen is in
Friesland, is ringrieën op Walchere.
Ik ebbe zelf mee 't ringrieën nooit vee haod, a was 't in Béékerke, wi a'k as
kind weunde, in de jaeren vuuftig, aoltied een eêl gebeuren. Ik ao familie
noch kennissen, die mien de liefde vö 't steekspel bie konde brienge en tot
paeren in 't algemeen voeld'ik m'n eihen ook a nie angetrokke. Ik ao d'r a
genoeg van a'k zag, da ze bie Leen Aolewiense in de stravalje stoenge om
beslohe t'oren.
Toch ging 't ringriefestijn nooit
ongemerkt vöbie op 't durp. 's
Ochens wier je d'r a wakker van.
Van geklepper van de paerepöten
(-bénen!) in de Durpsstraete. Aole
knollen en d'r berieërs verzaemelde
d'r eihen a vroeg op 't Kerkplein.
Dan wier de muziek angeslöte en
eêl 't durp kon meegeniete van de
"ringrietoppers". Wirom of ze ieder
jaer opnieuw wi "Loeje de klokke
van Limburg mien laond" een paer
keer ongevrohe tot onze oren liete
deudrienge, ebbe ik nooit begrepe.
Mè 't oorde bie de ringriedag, net
as de stank van de paerestrond en
de aolmè vuler orende witte pakken
van de ringstekers.
Noe nog eve die paele goed zette.
De joengers van d'oogste klassen
van de laogere schole waere d'r
ook a vroeg. Di was a d'n êle weke
over gepraot, wan.... di viel op zö'n
dag wat te verdienen. Te verdienen
mee 't oppassen op paeren, a ze nie
moeste lope. Je kreeg een aordige
zakcent, soms limenaode en een
bolus. Die limenaode naeme ze mee
uut het café van Sies. Di kwaeme
ze die dag toch geregeld..., alleen
nie dikwijls om limenaode! En
bolussen kon je kope bie bakker
Meulenberg, die weunde drek nest
de wedstrijdbaene.
Vö mien was dat verdienen eigenlijk
d'ênige reden om langer dan een
alf ure te he kieken. Ik was hin
supporter van een "plaetselijke
held". Ik vond de stank aoltied
Aflevering 173 herfst 2011