m van minstes 'n ure. Dae kon ik meziek van de distributie mee opneme, dat
gieng eêl goed. Maansenlieve, wat was ik dae groös mee.
Laeter as soldaot geleherd in Arnhem gieng ik mit m'n Zeeuwse vriend
op zondagaeven mit de trein naer Nijmegen waer mien zuster woonde.
Dan luusterde m'n naer Paul Vlaanderen in 't eên of 't aore mysterie. In as
't of'eloape was ard loape naer 't stesjon, want vö twaolf ure moste m'n
trugweze in de kazerne.
Nae m'n trouwen gienge de vrouwe in ikke somtieds naer mien
geboortestad in dan deeje m'n saeves gezellig kaerte mit de femielje. In
de pot zat oahuut 'n paer dubbeltjes, ma je ao d'r 'n eêlen aeven leut van.
Totdat de tillevisie kwam. Toe was de leut eihenlijk 'n bitje verbie, want dan
zaete m'n d'n eêlen aeven naer 't kasje te kieken, zwartwit netuurlijk, omdat
'r 'n show was van Wim Sonneveld. Nae ofloap waere m'n dan aoltied toch
'n bitje teleurhesteld. Je zie noe dikkels enkelt d'oagtepunten, ma zö'n eêle
show viel toch tehen. In nae de show was t'r nog 'n dagslutieng van pater
Leopold Verhagen. Zó naeme wulder van aole kanten wat mee.
Jao, die radio vroeher, wat m'n daevan vee leut aod. Noe luuster ik
trouwes nog wè vee, 5. Ma gin gepraet asjeblieft.
Henk Blom, dialect Schouwen
Mobieltie
Dit meutje is sins kort in 't bezit van "n mobieltie, ik hae d'r nooit êên wille
hè, mar noe bin 'k overstag 'egöö! Ik hè d'r 'n verschrikkelikke ofkeer van
as ik ménsen hööre belle in 'n wienkel over allerlei diengen wêêr ik nie
nieuwgierig naer binne. Over wa'ze wille ete in of ze d'r nog an 'edocht hae
om de kinders van schoole te haelene! Vroeger hao uuze ouwers dat toch
aok nie? In ik hè d'r aok nooit an 'ewild. In ik kan joele verzekere dat uuze
kinders nóóit vergete binne, in ete doe m'n wat de pot schaft in nie aors!
Mar da'k noe 'n mobieltie hè dat komt, omdat, joele zulle 't nie gelaove
mar ik bin 'n kostbaer femilielid kwiet 'erocht in hartie Rotterdam.
Zoas geweunlik most ik om m'n schöönheidspienbestriediengsinjecties
in Dijkzigt. M'n man riejt dan altied mar die hao noe n belangrieke
vergaderieng wêêr hie echt niet ongeruut kon komme. Noe hè m'n 'n
liejve schóönzeune, we hê d'r twêê mar d'r is t'r mar êên in 't bezit van 'n
riejbewies, in die liejverd zei dat 'n wel mit m'n wou rieë. Dus zóó 'ezeid
zóó 'edae. Noe binne ze altied bezig bie 't ziejkenhuus, dus aok deze kêêr
konne we niejt in de parkeergarage komme langs de normale route, dus
most ik uut steppe bie 't Sophia. Ik zégge tegen Tim: "Probeer de auto te
parkeren in deze straete, want dan kom ik aok hier weer terug(vromme)."
"Ja da za 'k doewe zeit 'n!"
Nae 'n half uurtie kom ik wêêr uut 't ziejkenhuus in steppe dezelfde straete
in wêêr ik aok uut 'estept binne, mar al wat ik zieje: gêên schöónzeune in
gêên róód autoo'ie. Ik laope de straete wat op in neer, want vaorder uut
de buurte durf ik nie te göón. Dan mar 'n cafee'ie in 'estept in vraege of
ik mag belle, 't Eênigste 06-nummer wat ik uut m'n hööd kan is dat van
uuze Agnita, dus via heur góó ik probêêre om Tim op te sporen. Mar de
eigenaer van 't café zeit da'k dêêr nie kan belle want allëêne de binnenlijn
is in gebruuk. Ja dat gelaoft deze boerin wel. Nog 's wat rond 'elaope. Ik
dienke: ik góó 't in 't Sophia vraege of ik mag belle. Dat mag wel, mar al wat
ik kriege is 'n vreemde bromtöóne in gêên Agnita an de lijn. Inmiddels is
t'r 'n hallef uure verstreke in noe bin'k nie zóó gaauw zenewachtig, mar 't
60 Aflevering 172 zomer 2011