48 Aflevering 171 voorjaar 2011
3
De paeren zette'n vö de rolkarre, dan oefde'n nie te loapen ni 'dostie. Op stal
krege ze 't zelde eten as 's ochens vroeg. Toen Wannes thuus kwam rook ten
buute a, dat Pie een stikje spek in de koekepanne ehbakke Lékker rook
dat. Pie mit de kinders zaete a grêêd. Eêst bidde in dan ete. De kinders zaete
oamae op der eige plekje, in aete. Praete deeë ze nie, want dat mocht nie
onder 't eten. Nae 't eten even een stikje uut de biebel leze in danke.
Dan gauw ni 'dostie. Om negen ure stieng ten wi op de sleper. Koffie ten
nie bie zen. Ie was zo dicht bie 'd ostie bezig, dat Pie de koffie om tien ure
op 't land kon brienge. Tot de middag was ten bezig mit de sleper.
Op den blok nèffen 't bóneland waere Arjaon in Merien an 't wieen
Die waere om zes ure begonne. 't Was vrêêd ard waarken vö die maansen.
Drie schoven krom stae viel nie mee. As ze op 't aande kwaeme mit een
jööie, dan gienge ze nie overaande stae. Dat was slécht vö je rik. Klaege
deeë ze nie. ledereen voelde zen rik w'aas.
Der waere der ok nog a, die een aolf met juun op déél Di stienge ze dan
's aevens ök nog in te wieën.
Van Merien mot ik nog wat vertaale. As de peeën uut waere in november,
dan gieng ten vö zen eige waarke. Ie liep dan mit een schraeper du de
polder in maekte de zielen schóón. Een schraeper was een lange stok
wi een soort lepel an zat, in mit dat dienk schraepte'n dan de slik uut de
zielen. De boeren moste dat doe vö 't waeterschap. Dan kon 't waeter der
goed du. Merien dee dat vö de boeren, in ök wé vö andere maansen as ter
een dam vö der uus lag.
In 't leste van december gieng Merien bie de boeren langs om 't zielegeld
op te aelen. Toen ten bie ons kwam, vroege wulder een keer of ten dat geld
noe bie den doomnie brocht. Ie zei di niks op.
Neeë, Wannes most dan wé een ure vroeger op, in was 's aevens
laeter klaer, ma ie zou nie wille ruile. Di kwam bie dat ten nooit allêên was.
De paeren waere der aoltied. Je most ter tegen praete, in zaage wat ze
moste doe. Allee, vast, duisop, ieto, aarop in ho, dat verstienge ze goed.
Noe even vö julder die allêên nog ma een autostuur kunne vastouwe.
4
Allee betekent beginne, vast is beginne ma je mö art trekke omdat et een
zwaere vracht is, duisop is achteruut, ieto is rechts,aarop is lienks in ho is
stille bluve stae. Ze verstienge dat êêl goed, in ze kenden je stemme, Je
zö vêê vriendschap van die béésten.
't Gaf ök wat meer centen in de bozze op 't aande van de weke. Een
paereknecht stieng noe eehmae oager in anzien dan een aarbëïer.
Om twaolf ure was ten wi op 'd ostie. Naedat de paeren ehdronke
uut de pit, krege ze wi der eten op stal. Zaalf schoof ten bie Pie an taefel. Ze
aete stamppot mit kaernepap achterop. De kinders konne gelukkig thuus
ete. As dat nie kon, dan most Pie twéé keer koke. Ze zou ze toch nie aalken
dag gebakke aerpels kunne geve.
Tegen ene de paeren der eten ok op, in was 't tied om wi ni 't land te
gaen. 't Slepen was klaer, in noe kon ten gae sléchte. Dat was êêl wat
zwaerder waark dan slepe. Je loap dan achter de égge, in dan trek je zö
noen in dan, an 't eggeout. De paeren trekke dan de égge ni bove, in dan
vaol de ruugte vantussen de tanden. As je een vuule blok dan trok je
jeneige rot. Tot aolf zesse was ten di mee doende, toen kon ten de paeren
