so m Aflevering 174 winter 2011
Geluud en beeld
I. Tante Hannie
Op weunsdagmiddeg kwam tante Hannie.
Niejt bie uus thuus, mar op de televisie.
Noe hao wielle zelf gëên tante Hannie
In 'n televisie al hêêlemaele niejt,
Mar Human Brëên van hotel Akershoek in z'n café wel.
Dêêr ko j' dan tante Hannie zieje
lelke weunsdag om vier uure.
Niejt da j' as kind in't café kwam.
Je bleef voor 't raem in 't sloppie,
In je was dêêr niejt allëêne,
Dus was 't zaek om op 'n rennene te zettene,
As ie om half viere de schoolpoorte epasseerd was,
Om in 't sloppie 'n goewd plekkie
voor ëên van de raemen te bemachtegen,
zööda j' tante Hannie teminsten goewd kon zieje.
In dêêr hieng ie dan voor de raemen
Op in an mekaore as 'n soort turnploeg.
Höóre ko j'ze nööit, mar 't gezicht was al genoeg.
Tante Hannie.
Laeter hao Flohil van hotel Bellevue,
Wêêr noe de Amrobank stööt, d'r aok êên.
Dêêr moch ie zelfs nae binne.
In noe ko 'j 't aok hööre,
O. wat was dat mööi!
Mar ik bin d'r mar êên kêêr binne eweest.
Toe 'k thuus vertellende hoe mööi dat 't was
In dat sommige kinders voor 'n dubbeltie
'n sukelaoderêêpe ekocht hao, riejp moewder uut:
"Ja, ja, dêêr is ze 't om te doewene,
om zóó geld uut je zak te kloppene
in zelfs kinders al 't café in te lokkene.
Lae 'k 'r niej mêêr van hööre!"
Zelfs noe nog, 'n halven êêuw laeter
Voewl ik m'n eige soms nog schuldig as ik in 'n café
zitte.
II. Televisiepresentator
Netzöömin as n kerstbaom kwam 'n televisie d'r bie uus niejt in. 'n
Kerstbaom was heidens in mit zöö'n blaeuw schèrm haelende je d'n
duuvel zelf in huus. Vaoder zou 't nog wel mööi evonge hè, mar hie wist uut
ervaering al dat 'n 't tegen moewder toch of zou motte lègge, dus hiew 'n z'n
mond mar.
Wat d'r wel kwam, was 'n trapurgel. Op 'n dag kwam vaoder thuus
van z'n negosierond'ie, want wiele hao toe nog 'n handeltie in allerlei
kruujenierswaeren. Hie hao ongerwege ehöörd dat Hansie van Goovertie,
die op de Meulblok weunende 'n oud Amerikaans harmonium hao stöö,
wêêr 't 'n of woe. Hansie was meulenaer eweest. Hie hao wel gêên echte
