Aflevering 170 winter 2010
Terneuzensestraote
Daor ao je Dieleman de timmerfabriek
en dao wérkten altied een êêle kliek.
Leen'outs was krujenier.
Verkocht van alles behalve bier.
Bie Kee van Wanne, een soort supermart,
dao koch je voo een cent van 't schiemblad.
Stokvis en appelsienen die laohn vöó 't raom
mao 't schiemblad da gaf eur eihenluk naom.
En mee al dur krujenierswaoren
iew ze 't vol vele jaoren.
Dekker was wêê zo'n timmerman
en die kon der oek wa van.
Kees Rouw dao kon je kleren laoten maoken,
a je tenminste an centen kon geraoken
Geelhoedt, slaoherieje a jaorenlange,
die was vöör een verbouwing nie bange.
Knijf, garage en fietsenwienkel in de straot
stieng vöör iederéén paraot.
Van der Baanstraote
Bie Stoffels kon je kachels kööpen of een nieuwe fiets,
mao vèdur ao je daor ëêmao niets.
Achteraf ao je nog Van Èrentals, die brocht overa de vracht.
Maor aod oek den lekkersten ijsco, lekker zoet en lekker zacht.
Plein
Markusse van de smederieje,
besloeg de pèrden zoda je dur wêê mee kon riejen.
Van Breen, krujenier, maokten zelf boter,
da wist iedere kleine kööter
Heel'oedt awêê een wèrme bakker,
vroeg nao bed en oek vroeg wakker
Kapsalon Lènsen vöö daomes en vöö heren
hieng 't z'n zeune oek leren.
Daon Riemes, vèrve en behang
en da was in ieders belang.
Bakker Boer awêër 'n krujenier,
die tel ik een êêleboel ier.
Almekinders, textiel, dekens, laokens en slööpen.
Van alles kon je daor op da gebied kööpen.
Gezusters Heel'oedt,verkochten koffie en kaos
en waoren lekker udder eihun baos.
Keetje Schieman serviesgoed da was geslaogd,
maor ze wier deu de kinders vaok geplaogd.
Keetje Pupuntje noemden ze eur
en ze liep dikkels vöö niks nao de deur.
De Ruischer, electriciteit en lampen,
die ao mee concurrentie te kampen
Kees 'Aok verf .behang en textiel,
je snap nie dat er nog wa te verdienen viel.
