Aflevering 170 winter 2010
Wienkeltjes in Zaomslag
't Is a meer as zestig jaor geleejn
da zóvee wienkeltjes op Zaomslag 't goed deejn.
Dao bin dur vee van uutgeroeid
maor oek 'n stik of wa hrööter hehroeid.
Veerstraote
Merinus Galle die was timmerman
en maokten dur nog a wa van.
De buurtwienkel van Van Langevelde Ko
verkocht van alles en da dee die ZO.
Jan Fraoien'ove beter bekend as Jan Schoen,
z'n kleinzeune zit noe op 't Plein, je moet 't um maor is naodoen.
Van Westen Herenmode en Kleermaokerieje zit noe oek op 't Plein
wan z'n zaokje da wier wa te klein.
Arjaon de Vos, buurtwienkel, hieng mee kar-en-pèrd nest de deuren
om zo z'n agosie uut te leuren.
Kapper Buuze was de heren- en daomeskapper.
Zit noe mee alles in Terneuzen das oek dapper.
De Fuiter, koleboer, uut de Veerstraote
leverde kolen van vroeg tot laote.
Teeuwtje de Blaoi, waohenmaoker was z'n stiel,
maokten alles, a was 't maor 'n wiel.
Deurwaorder, buurtwienkel, nog maor is ëên,
daovan ao je dur op 't durp wel êên an iedere têên.
Duvestein, drank verkocht ie, hieng nao 'd Axelsestraote ver'uuzen,
dao verkocht ie oek drogisteriespullen en verhif vóö de muuzen.
't Noordstraotje
Daor ao je Slotemao boek'andel en drukkerie,
dao liep je nie zomao vööbie.
Jan de Krieger mandemaoker was z'n vak.
Mao knikkers kon je der oek köpen, voor een stuuver 'n êële zak.
Jannao van de Velde aod een krujenierswienkeltje in die straot
en iew dao vee ménsen aon de praot.
Een schoenwienkel van Jan de Vos,
die verkocht der lustig op los.
Pau Dëê, behang, verf en drogisterie,
end ie dee dao nog van alles bie.
Joris Wisse's slaoherieje mee slachtplaots en al,
die slachtten de koeien zö uut de stal.
'Aomelink de Sparkrujenier verkocht oek melk der bie,
hieng nao 't Plein, 't wier Meermarkt en je moet et noe is zie.
Koepoortstraote
Wisse die was schoenmaoker van z'n vak
en zelf was tie van de slaoherstak.
Timmerman Keiser verkocht een plankje, latje en een spieker
en zö, dochten wudder, wier Keiser apmao rieker.
J' ao daor oek nog een krujenier da was Ante 'Aok
wad a je daor oek kocht 't was altied raok.