Aflevering 169 najaar 2010
an de brêêje festonnen, die an die brêêje puupen zatte in dadde m'n 'n
ziejkte op ons lief zouwe laeje. Jae, mien opoe maekte d'r mêêr drukte over
dan ik over joe, joe hiejt dat dieng aok awweer? Oh ja, tangaslip.'
'In zatte daer aok bandjes an?'
'Netuurlik, hoe most je 'n anders ophouwe? Mar je most wel goed oplette,
dat zo'n bandje niet los gieng of brak, want dan gieng de kleppe neer in
hienge de bandjes onder je jurk uut. Dat was de gróótste ramp, die je kon
overkomme, want as dat op straet beurde, hadde de schooljonges dat zo in
de gaten in prebeerden ze op de bandjes te trappen. Dan holde je wel mit
'n róód hööd nae huus!'
Willy grinnikte, ze zag poepoe al laope mit die twêê bandjes van onder d'r
jurk.
'Even wacht' zei poepoe. Ik mot d'r nog 'n versje van hao. 'k Zal 't 's lange,
oor.'
In poepoe dook in de linnekasse, waer ze 't uut een döóze mit alderlei
papperassen langde. Wat zou poepoe daer noe weer uuthaele?
In ja, oor daer had ze 't. In ze las:
Meisjes opgepast.
Ze liejpe te kuieren mit z'n driejen,
d'r rokjes kwamme mar net tot d'r kniejen.
Je zal wel zégge, dat gaet je niet an,
mar stakjes hóór je 't waere d'r van.
Ze hadde een flienke rondte gedaen
in zouwe noe mar nae huus toe gaen.
Toe zei d'r êên: ik hööre wat kraeke,
zou d'r soms wat los gaen raeke?
Och had ze toen mar even gekeke
want wat is d'r laeter gebleke?
Net waere ze in 't durp gekomme
of ze riejp: 'Wat is m'n noe overkomme?'
Ze wees nae benee in mocht wel schrikke
wat uut d'r rok hieng, wil ik niet verklikke.
Een paer jongers krege al gauw in de smiezen,
wat dat meisje zou kenne verliejze.
Eerst stonge ze wat te ginnegappen
in woue toen op de bandjes gae trappe.
Ze liejp zomar in huus bie vrimde ménsen
die gawe gehöór an d'r bizondere wénsen.
Mit een veiligheidspelle was de kwaele geneze,
mar deur dit verhael is êêr wel beweze
dat 't wel geraeje zou lieke
goewd nae alle bandjes te kieken.
D. K. Soldaat-Poortvliet, dialect van Dirksland
