Aflevering 167 voorjaar 2010
Ik docht: Ik gae êêst mae 's kieke o'k plaetjes kan vinde van de provinsje
voo de "homepage", want at die d'r goed uutziet, bi je a 'n aande. Miel aode
êêl mööie foto's in toen moste mun de volgorde bepaele. Kees zei: Mun
beginne an de lienkerkant mee 't logo van de Verênigienge. Daeneffen komt
de kaerte van Zeeland in daenae neme mun foto's die van zêê overgae in
land. Dat is de beste meniere om onze provinsje uut te beelden.
Mun wiste trek a dat op de 'homepage' een lied van de maend most
komme, in een verael, in een spreekwoord van de maend. Want zei Kees,
anders öört 't vee te statisch in dan gae ze mae ééne këër nae de site in
laeter nie mëë. Miel aode genoeg spreekwoorden om 'n stuitje mee vooruut
te kunnen. Voo 't lied van de maend begonne mun natuurlijk mee 't
Zëëuwse volkslied, want dat aode mun in 'n mööie uutvoering. D'r most ok
'n lieste mee activiteiten op de site komme. Dat zou Kees uutzoeke in nae
mien stiere.
't Begin wast'er, mae de structuur van de site was noga ingewikkeld. Kees
zou êêst kieke wat voo informaosje iezellef aomae aode in dan moste mun
voo aore documenten aore maansen inschaekele. Dat leste bleek vriewel
nie nöödig want Kees aode zöö vee op z'n computer stae. Dae konne mun
wae mee vooruut.
Vanof dat moment ei Kees mun ebombardeerd mee geschriften. De
mêëste waere êêl oud, mae voo maansen die geïnteresseerd waere in de
geschiedenis van de Zêêuwse Dialect Verënigieng waere d'r mööie veraelen
bie. Mun moste natuurlijk ok 'n plekje vinde vöö de folder, in aolle boeken
in publicaosjes moste d'r ok opstae. In natuurlijk de inhoudsopgaeve van
de Nehalennia's in de vraegeliesten.
Omdat mun graeg vee nieuwe leden d'rbie wille kriege, most 'r iets opstae
oe je juneige an kon melde. Ok veruuzingen moste emeld kunne ööre via de
site. Misschien bin d'r maansen die goeie ideeën ao, dan kunne ze dat via
'Contact' laete wete.
Eén van de belangriekste onderwaerepen van de site was: Actueel. Dae
konne mun vee informaosje onder kwiet. Miel zei toen: dan maek 'k dae 'n
'drop-down' menu voo. A ze dan bovenan klikke, kunne ze trek zie wat 'r
aomae onderstaet". Mun waere zöö blie mee dit idee, da mun nog vee mêêr
van deze liesjes emaekt ao. 't Maek aolles anëêns vee duudelijker.
Toen a 'k zei dat mun foto's moste gae verzaemele van de bestuursleden, in
dat die leden ok 'n kort veraeltje over d'r eige an moste levere, ei Kees z'n
eige dae op estort in in korten tied kreeg 'k foto's in korte beschrievingen
waer ak mêê an de slag kon. Omdat Kees vond dat aolle bestuursleden
makkelijk bereikbaar moste weze, moste mun ok 't emailadres van iederéén
ao. Toen lêêrde 'k Kees pas echt kenne. Je sprak iets of in dan reageerde
Kees trek. Ik oefde nööit twêê këêr te vraegen. De snel'eid van waerreken
van Kees is ongelooflijk. Ie stierde ok diengen wae 'k achêêl nie om evrogen
oade in dan most ik dae 'n plekje voo zoeke.
Kees in ik ao êêl wat pad of'eleid saeme. D'r was iedere keer wee wè wat
dat mun mee Miel moste bespreke. Ze gienge ons a kenne in Veugelwaerde.
In de maansen achter de loketten bie de tunnel zeie a: 'Gaene je noe weer a
nae den overkant?'
Aje zöö vee maenden mee mekaore an iets waerrekt, wil je 't resultaot
