schure nae binnen te komme, mè da hieng ook nie. t'Klinket zat op slot. t'Eenihste watter hebeurde
was da oal de beesten wakker wiere. d 'Oenders begonne te kaekelen en 't was een leven van
jewelste op't of. Janna kwam nae voren uit de bestie in d'r onderkeus en ok vaoder Ko kwam op
t leven of. Merien oefde nie mi op de raemen te boenke om binnen te komme, ie oa a leven henoeg
hemaekt!. Merien was voe twelf uren tuus, mè k'hlove nie da z'n voader blie was.
Ik bin mè op d'n diek hebleve en un paer weken nie nae Merien toe hewist. Laeter oorde ik van
Merien da Kee un puut in z'n jaszak hevonde oa!
Merien slaehde mie hoeie ciefers en is nae Delft hehae om voe inzenjeur te lere. In die tied zag ik
Merien nog in de vekansies. Un keer was Merien tuus. Noe wou 't heval da nest 't of Weltevree 't
of 'Altijd zorgen' lag van Arjoan de Rijke. Arjoan was twi jaer heleeë hesturreve en z'n weduwe
Coba was un pront wuuf. 't Was bekend da Pastoor van Noort liever bie rieke en joenge dan bie
erme en oue weduwvrouwen kwam. Zo kwam um noha is bie Coba; ook un keer toen Merien tuus
was. Van vroeg af an a Merien un ekel an de pastoor, 't Was pas nae d'n oorlog en de pastoor oa a
un autotje; un Fortje. Merien zag 't Fortje stae op den opril bie Coba en kreeg un idee. Ie zei tuus
dat un hing keure, mè in plekke van te wandele, schroefdenie de ventielen uut de banden van den
auto van de pastoor, zodat un vier lekke banden oa. Toen Merien tuus kwam zeiten datten nae béde
ging. 't Was noch mè negen uren en z'n moeder vroeg waerom un zo vroeg nae béde hing. Merien
zei dattun moe was en vroeg nae béde wilde hae. Dat was nie de reden. Van z'n slipkaemertje kon
ie den auto zie stae op d'n opril bie Coba. En ja oor, om tien uren kwam de pastoor nae buten. Ie
bleef nog even stae proate in de deure mie Coba en hing toen nae den auto. Ie startte den auto, m' e
kon nie goed wegrieë. Toen un uutstapte, zag un wat er gebeurd was. Merien kon zie datun kwaed
was. Ie oorde nie wat de pastoor zei, mè wellicht eiten Hod's naem ijdellik gebruukt. Wat noe? De
pastoor kon nie bie un vrouwe alleen bluve slaepe. Dat was onmeuhelik in die tied. Coba oa ook
hin tellefoon en dus most de pastoor drie kwartier naer uus lope.
De volgende dag, 't was zondag, preekte de pastoor over de zondige menseid. Ie donderde vloek en
verdoemenis van de kansel. Hoe de menseid en in't biezonder de mensen van Overzande zo
afgedwaeld waere van 't waere geloof en gin eerbied meer oan voe de pastoor die weduwen
vertroostte. Toen nae afloop van de mis de opbriengst van de collecte geteld wier, zaete daer de vier
ventielen van z'n auto bie!
Maendag kwam de smit Joos Smallegange op z'n stoomfiets en un fietspompe en pastoor Van Noort
achterop nae d'n auto op d'n opril bie Coba de Rijke. Joos Smallegange mè pompe en de pastoor
kieke. Toen 't bienae klaer was ging Merien ook es kieke en vroeg de pastoor of t'n kon ellepe.
Merien wier werrektuugbouwkundig inzenjeur en ging eerst werreke bie Shell in Amsterdam.
Merien wou eihenlijk liever eige bees weze en nae vuuf jaer is ten voe z'n eige begonne mie un
fabriekje voe instrumenten. Da hieng erg goed en toen d'n vuufenvuuftig was, ei ten 't voe vee held
verkocht. Ie bleef nog as kommesaris en adviseur an de fabriek verbonde. Noe is t'n nae Amerika
voe de fabriek, mè ie ei hezeid datun volhend jaer nae de reünie za komme. Ik most julder in ieder
heval de hroetenisse overbrienge.
Jeugdherinnerieng
Toen a'k jonk was, waeren al de zeumers mooier.
De daehen langer, en 't hras was altied hroen.
M'n opa en m'n opoe leefden nog,
Dae krehen m'n soms zweerte.
En overdag op straete, viel 't er altied wat te doen.
Mac komt van Driewegen op Zuud-Beveland
47
