d'r altied boovenop, in prikkende'n gereegeld mit z'n vurreke in de aerepels om te kiekene of ze
nog niejt gaer waere. Voor mien moste ze as't waere op m'n bord danse as ze op'edae wiere. Oopa
keek altied of d'r al 'n bee'ie blom an zat. Dan vong 'n ze pas goewd. Bie dat niewe aerepeltjies
perbeerene dee oopoe altied in plekke van spek bakke lekkere boerebutter smelte. Dat was om je
viengers d'r bie of te likkene. Zoeo lekker vong-ek dat.
Ja, 'k hea hieel wat angenaeme herinneriengen oover ehouwe a'm'n oopa in oopoe Bosland.
Jammer genoeg is oopa al betrekkelek vroeg esturreve. Hie kreeg de gevrieesde ziejkte van d'n
ouwen dag in wier d'rvoor nae Eudookia ebrocht, in Rotterdam. In dieer is wat ebeurd da'k ze niejt
gaow zal vergeeve. Dieer hea ze, zonger aok mar iejtewat te vraegene, oopa z'n langen griezen
baerd of'eschoore. Uuterlek was oopa m'n oopa niejmieer. 'k Zieje moewder nog schrieewe toe ze
't vertellende.
Ze hao d'r eige vaoder niejt ekend, toe ze bie z'n kwam.
Ze hea oopa wel e'oopereerd, mar dat heit op d'n duur niejt magge baete. Hie voe'lende wel dat't
noeojt mieer wat mi'z'n zou woore. Dieerom kreeg ik z'n vulpenne van z'n 'n Swan. Die hao
naom Jaop voor z'n mee'ebrocht toet 'n oover was uut Ameereka.
Niee, oopa zou d'r niejt mieer mit schrieve in de boeken van de Menistekeareke
Oopa is esturreve.
Nae de begraefenis nae de koffie mit de broeo'ies las Jan Bok, de begraefenisongemeemer,
uut Preedeker twelleve voor.
Dat za'k va'm'n leeven niejt vergeete!
Dat is dat hoofstik wieer stoeot dat "de maalsters, ophouden, omdat haar aantal gering geworden is
en zij die uit de vensters zien, hun glans verliezen en de deuren naar de straat gesloten worden
want de mens gaat naar zijn eeuwig huis
Niejt zoeo hieel lange dieemae is oopoe aok esturreve
Ik zal oopa in oopoe Bosland noeojt vergeete, zoeolange ik leeve niejt.
Mar toet m'n schrik bedienk'k dieer, da'k noe al ouwer bin dan oopa zellef oeojt ewoore isDieer
mö'je niejt minne'ies oover dienke
D'n Haege, augustes 1990
41
