zakmes, net zoeolange toedat'n 't basjie d'r of kon schuuve. As'dat ebeurd was, most'r nog 't ieen
in 't aore an esnikkerd woore, voordat 't sluuffie d'r wieer ooverheene gieng. Dan nog 'n keepie in
't sluuffie zellef, 't mon'stik nog wat schuin weigsnieje in klaer was kees. Dan hao ik m'n flui'ie!
Stikgroeos dee'k'r dan op fluite, zódat iederieen kon zieje in hoeore da'm'n oopa 'n flui'ie kon
maeke van zoeomar 'n stikkie willege- of elzehout.
Oopa hiew aok van lekker eetene, vooral mossels lustende graeg in kruukels mit veel juun, zout,
peepere in nezien. Ik woe altied groeot doewe, in dee dan mi'z'n mee, of'k dat noe lekker vong of
niejt .In 't voorjaer begon 'n al vroeg tee'm'n oover de niewe aerepels. Dieer waere m'n allebiee
gek op. "As de bloompies d'r in komme", zei'n,"dan binne ze bienae riepe. Dan kunne m'n ze goeo
perbeere." In wiele mar wachte. Oopa hao mieer geduld dan ikke. Mar eindelek was't dan toch zoeo
vaorde, in gienge m'n saeme nae d'n "lamblok" - ik zei altied "d'n lamblok", mar dat zal achteraf
bekeeke toch wel "landblok" eweest motte hea. De "lamblok" was wieer oome Pau weunende, in 't
Waeterweegie. 'k Weet nog goewd da'm'n dieer nae toe gienge in dat'n m'n ongerweege, dieer
duchte bie de 'koopmajn'ies", langs de kant van de wegt de valleriejaonbloompies anwees in dat'n
teen me zei, dat'n die gieng teele voor meedesienen. Dat hao'n of'esprooke mit d'n ieenen of
d'n aoren verteegenwoordeger, weet ik wieer vandaen. 't Is noeojt wat ewoore. Oopa dee graeg 'n
bee'ie spikkeleere. Hie dee bevoo'b'ld aok in de staeslooterieje speele - dat dee wiele griffermeerde
niejt, dieer dee je zonge an, zei vaoder - in hie wachtende dichte mit z'n juun te verkaopene toet de
pries zoeo vaorde ekelderd was dat'n d'r zoeo goewd as niks mieer voor maekende. Oome Pau hao
dat aok. Die mocht aok graeg 'n bee'ie gokke. 'k Hea'n oeojt op 'n bezar bie 't rad van aeventuur
beezeg ezieje, da'k as klein jonge'ie al docht: "Oome Pau, oome Pau, houd d'r mit op! Je verdoewt
al je goeje geld. Mar hie was d'r geweun niejt bie weig te sloeone. Ik vong dat zonge van de senten.
De Taenessies waere veel zuuneger dan de Boslajn'ies. Oome Pau hao gieen kinders in hie hao alles
voor 'n aor oover. Ieder jaer gieng'n mi' mien in Henk van tante Joppie mit Sinterklaos nae
Rotterdam. Dat za'k noeojt vergeete. Dan dee'k 's nach's gieen aoge dichte, zoeo benaowd was'k
da'k m'n eige zou verslaepe, wantje most al om zes uure mit d'n tram mee.
Mar noe gaow vromme nae de niewe aerepeltjies.
Op d'n "lamblok" zocht oopa dan mit ooverleg 'n paer bossies uut, wieer 't lof al van begon of te
sturrevene. De aerepeltjies waere mieestal niejt zoeo eareg groeot, lae m'n zea: mar zoeo groeot as
stuitertjies. Mieestal zeije m'n dan tee'n mekaore:"t Bin nog mar knikkertjies, mar die smaeke best
lekker as ze mar goewd stief binne van die slappe dieer is niks an." Oopa vong dat de aerepels
eteeld moste woore zonger kunstmis die voor eige gebruuk wel te verstoeone. Mit kunstmis d'r
op wiere ze veel groeoter in zwaerder dat bracht mieer op. Mar oome Pau hao d'r 'n hajn'ie van
d'r 'n kittege dotte sieliesalpeeter of weet ik wat ooverheene te goeojene. Dat bedurrevende de
smaeke, zei oopa. In as oopa mearekende dat 't lof al te weeleg groejende, in niejt zoeo gaow doeod
woe goeo, zei'n:"Diejn vrotten Pau is netuurlek wieer beezeg eweest mit z'n kunstmis." Ja, op
oome Pau kon'n wel es foetere, as dat zoeo uut kwam.
Tuus wiere de aerepeltjies dan mit zurreg eschrapt in ekookt. Ik zea noe wel ekookt, mar oopoe dee
de aerepels "ooverhange". Vroeger kookende ze ommers op 'n oope vier. De meansen stookende
toe inkeld hout. D'r was bos genoeg op Oudurp. Oopa hao altied 'n houtklampe achter de schuure
voor 't groeoste dieel musterek in knozzen.
Niejwe aerepeltjies kooke rook vroeger onnorrem lekker. Dat ko je al van de wegt of ruuke a'je
verbie kwam teegen eetenstied.
De smaeke hieng boovendiejn of van de grond wieer ze op eteeld waere.
Moewder zei dat die uut 't hof van Baele van Hans de beste waere. Dat was dieer schuins
teegenoover oome Kees in tante Durrefie an d'n Dirrekdoewnswegt.
Je most, as 't eigenheimers waere - in die smaeke as vroege aerepels toch nog altied 't beste - altied
goewd uutkieke dat ze niejt ofkooende. Dan wiere zoeo slap in was d'r niks an. Dieerom zat oopa
40