M'N OOPA IN M'N OOPOE BOSLAND
Sors van Piejt van Sors
M'n oopa van moewderskante hiejtende Maert Bosland in m'n oopoe Mertiejn'ie Taenes.
Ze hea voor mien as kind hieel veel beteekend.
Oopa hao 'n langen griezen baerd in oopoe was nog op z'n ouwerwes eklieed. Dat wil zea dat ze
deurdeweeke 'n ieenvoudege, witte, gehaekte muste droog mit twiee van die ofhangende bajn'ies.
Vaorder hao ze netuurlek zoeo'n kort, zwart keursliefie an mit van die ronde, bobbelege knaopies,
in 'n lange zwarte rok mit 'n split voor d'r kooszak voor d'r portemenee in d'r neusdoek. Oover
d'r keurs heene hao ze dan nog 'n gries, fiengeruut schortel, 's Zondaeks, as ze nae keareke gieng
hao ze 'n witten hoeodoek op, ieejn'ie zonger kant. Die droege de vrouwelien as ze in de rouwe
waere, of as ze d'r zoeo ieejn'ie mit kant te diere vonge, dienk'k. Oopoe hao aok mar van die
ieenvoudege, luchte, gouwe krullen mit twiee sierspellen an weerskante van d'r veurhoeod. Je
begriept 't al, oopoe was in gieen geval de vrouwe van 'n groeoten boer, hoewel de ieerlekheid
gebiejdt te zeagene, dat d'n dracht van Oudurpse boerevrouwen stikken ieenvoudeger is dan die van
de Zieewse.
Oopa hao mar 'n klein boerespille'ie an d'n Broekwegt - wieer noe dat bezienestasjon is van Jaopie
Poortvliejt - in hie ree mar mit ieen paerd. Op stal stienge mar 'n koeje of driej-viere, in dat waere
dan gieenieens mellekkoejen. Oopoe mollek voor d'r eige twiee geiten. Oopa hao trouwens al van
alles edae in z'n leeven. Hie was vrachtriejer eweest nae de boeot op Stellendam in hie heit aok nog
'n hortjie 'n herrebearege ehaod, dieer iejvers an d'n Helhoek a'k 't goewd hea. Mar dat was lange
voor mien tied, dus kan'k dieer naegenoeg niks weetenswaerdegs oover vertelle. Oopa was, glaof'k,
in weezen niejt zoeo'n echten boer. 't Boerewearek dee oome Pau voor z'n, mar of die d'r noe echt
zoeov'l plezier in hao, vraeg'k m'n eige aok nog of.
Oopa was boekhouwer van de Menistekeareke. Die Menistekeareke hao nogal wat land in dat wier
dan verpacht an de leeden om d'r d'n doomenie van te betaelene in de keareke van te
ongerhouwene. Dieer most oopa de reekeniengen voor schrieve.
In 't naejaer was'n massienist op d'n Eêndracht, die siegereifebriek an d'n Broekwegt, naest de
Voortmajn'ies in teegenoover 't vlasfebriekie van Kees Lodder.
D'n Eêndracht is d'r noe al lange niejt mieer, net zoeo min as de rest van de Oudurpse
siegereifebrieken. Die bin allemaele of'ebrooke. D'r woordt noe niejvers mieer peekoffie edronke.
Ze gieng trouwens in diejn tied al groeotendieels nae Belgieje, hea'k wel es hoeore zea.
'k Hea wat kieeren bie oopa wee kieke in de mesienekaemer. 'k Zieje'n nog in de weer mit z'n
ooliespuite. Oopa dee altied alles hieel bedaerd in persies.
Ik kwam bienae iederen dag bie oopa in oopoe Bosland. Ik dee de booschappen voor oopoe - 't
broeo'ie meel nae d'n bakker bringenge in 's aevens wieer op haele bie Jan d'n Bakker. Dan
kreeg-ek 's saeterdaeks zoeo'n vierkant stuuvertjie van oopoe. Dat mocht'k dan versnoope.
'k Hea 'n tied ehaod da'k'r tussen de middeg gieng eete. Ze atte mieestal gebakke spek. Dat
lustende'k wel niejt zoeo graeg, mar dat hao'k'r graeg voor oover om d'r te kunne weezene.
In de wintere was'k 'r graeg op zondagaevend. Dan dee oopa in de voorkaemer d'n oopen haerd
ansteeke. Dat was zoeo'n giejtiezdere kachel, wee'ie wel, mit zoeo'n hallefbolvurmege schuuve,
die je dicht dee om 'n te laete trekke in die je oope dee as'n goewd brandende.
Dat vong'k altied onnorrem gezelleg, vooral tussen licht in donker, as de peeteroolielampe nog niejt
an'estooke was. Dan lei-ek op m'n buuk voor d'n oopen haerd in de vlamme'ies te kiekene, of 'n boek
te leezene van L. Penning oover d'n boerenoorlog: De Leeuw van Modderspruit, mit Blikoeortjie
d'r in, of van W. G.van der Hulst: Jaap Holm en z'n Vrinden of Hollandse Jongens in den Fransen
Tijd. Dieer stienge van die moeoje plae'ies in van Jetzes of van Isings... prachteg geweun!
37